САМҒАТҚАН САН ҚЫРАНДЫ - АЛТЫН ҰЯМ

Мерейтой

 

Қараша айының 3 күні аудандық мәдениет үйінде № 13 орта мектебінің 80 жылдық мерей тойына арналған «Самғатқан сан қыранды - алтын ұям» атты салтанатты кеш өтті. Осынау игі шараға білім ордасының байырғы түлектері, ардагер ұстаздар мен аудан жұртшылығы қатысты. Алтын ұя мектебін бітіргелі ондаған жылдар болған түлектер балалық шақтың бал күндерінен сыр шертетін көрмені тамашалады. 

Иә, мектеп қабырғасында өткізген баяғы, аяулы балалық шақтың балғын күндері баршамызға ыстық. Сыңғырлаған қоңыраудың үнімен мектепке асығып, әр сабақ сайын тыпыршып отыратын қимас сезімдер мен риясыз күлген ақкөңіл күндер әр түлектің жадында мәңгі сақталары анық. Мұны іс-шара барысында мектептің алған асулары мен шыққан белестері, тарихи жолы таныстырылған слайдтан байқадық. Тіпті, 1944 жылы 4 «в» сынып оқушысы болған Галина Шахованың естелігі де жүрекке тәтті мұң ұялатты. «80 жылдық тарихы бар қаттаулы, әрбір жылы шежіредей сақтаулы. Үштөбеге тартылғанда темір жол, есік ашқан мектебіміз мақтаулы» деп ашылды кеш шымылдығы.

Қойнауында талай тарихты бүгіп жатқан білім ордасы осы жылдар ішінде мыңдаған шәкірттің жүрегіне нұр құйып, түлетіп ұшырды. Солардың жеткен жетістіктері, шыққан биіктері, атқарған игі істеріне сүйсініп, жұрт мақтанып жүрген жайы бар. Тарихы терең, шежіресі мол білім шаңырағы жайлы аталмыш мектептің түлегі «ҚР білім беру ісінің үздігі» Айтжан Оспанованың қаламынан туындаған «Толқын» атты сезім лирикалық өлендер жинағынан оқушылар әдеби монтаж ұсынды.

Көпшілік алдында аудан әкімінің орынбасары Қайрат Қасымов № 13 орта мектебінің ұжымы мен түлектерін мерейтойымен құттықтады.

-  Армысыздар, құрметті ұстаздар қауымы, оқушылар, ата-аналар! Бүгінгі мерейтойға жиналған қонақтар! Бүгін барлығымызға қызығы мен қиындығы мол, әрбір оқу жылының қайталанбас тарихқа толы мектеп мерекесі - № 13 орта мектебінің 80 жылдық мерейтойына жиналып отырмыз. Бүгінгі мерекелеріңіз, тойларыңыз құтты болсын! – деді Қайрат Саханұлы.

Ол  бала кезінде Қаратал ауданы мектептерінің қара шаңырағы саналатын аталған білім ордасында оқуды армандағанын айта келе, аяулы мектебін ұмытпай келген түлектердей болуға шақырды. Сондай-ақ, мерейтойға орай № 13 мектептің ұстаздары А. Қосанова, Қ. Құрсабаев, Ж. Нүгербекова, С, Есбергенова, Ж. Мәдібекова, Л, Солғынова және басқаларға Алғыс хаттарын табыстады.

Іс-шара барысында мектеп шәкірті Айерке Дәулеткелді «Ұстазым» әнін әуелетсе, музыка пәнінің мұғалімі Құмдаулет Құрсабаев арнау өлеңін тарту етті. «Түлектердің қоштасу вальс» әніне ырғалып билеген ата-әжелер, жастық шақтарын есіне түсіріп, бір жасап қалды.

Сөз тізгінін алған мектептің бұрынғы директоры Назкен Игенбаев «Қаратал өңіріндегі байырғы білім ордасында мұндай педагогикалық команда 80 жыл бұрын қалыптасқан. Сонау 1937 жылы ашылған № 16 орта мектептің алғашқы педагогикалық ұжымының ауызбірлікті, оқушыға деген қамқорлық, нағыз педагогикалық шеберлік, шынайы құштарлық сезімде алғашқы Советтік Қазақстанды аяғына тұрғызу кезеңінде директоры Омаров Есенкелді, оқу ісінің меңгерушісі Амербаев Расим, тағы басқа  ұстаздардың ұлағатты істерінен қалыптасқан» дей келе, «Ұстаз» деген биік атаққа ие болып, шәкірттерінің алғысына бөленіп жүрген азаматтарды атап өтті.

«Тарихта ұстаз деген ұлы адам бар» атты қанатты сөзді жадына түйген мектеп ұжымы жас ұрпақтың санасына сауле түсірген, сапалы білім мен тәлім тәрбие беріп, үлкен өмірге қанаттандырып ұшырған ауданымыздың оқу-ағарту саласында жемісті еңбек еткен ардагер ұстаздар құрметпен ортаға шақырылды. Ел құрметіне бөленген, шәкірттер жанының бағбаны атанған жандардың қатарында С. Тоқбергенова, Қ. Бегасилова, Н. Уалиева, З. Каріпова, К. Бөлекбаева, Р. Досболова, Т. Арыстанбекова, Х. Әжікешова, К. Шайықова, Б. Найзабаева, Г. Дусбаева, Р. Шахатовна, С. Шіркінбаева, А. Темірбекова, Т. Жиенбаева, К. Суранчин, О. Алпаровалар бар екенін атап өткен ләзім.

Мектеп қабырғасында білім алып еліміздің түкпір-түкпірінде әртүрлі салада жемісті еңбек етіп жатқан, ғылымның қия жолында жүрген мектеп мақтаныштары сахна төріне шақырылды. Елімізге белгілі азаматтар Айтжан Тыналиев, Аманғайша Тасболатова секілді түлектер ұстаздарын көргенде толқып, көздеріне жас алғанын жасырмай, жүрекжарды өлеңдерін оқыды. Түлектер атынан мектеп ауласына көрік пен сая беретін таңдаулы тал-терек тарту ететінін айтты. Мектеп ұжымы түлектерге фотошежіре ретінде естелік сыйлықтарын сыйлады. Сонымен бірге экран арқылы ардагер ұстаздардың және шетелдерде оқып жатқан мектеп түлектерінің құттықтауы қуанышты еселей түсті. 

Мерейтой соңында мектеп директоры Шынар Шарипбаева алтын ұя мектебін ұмытпай осынау айтулы шараға келген түлектерге алғысын білдірді.

Асхат БАҚЫТҰЛЫ

КЕЛЕЛІ КЕЗДЕСУ

Білім ордасында

 

Қараша айының 6-жұлдызында қаламыздағы № 13 орта мектебінің базасында география ғылымдарының докторы, ҚР «Құрметті туризм қызметкері», Халықаралық балалар мен жасөспірімдер туризмі және өлкетану академиясының «Алтын компас» иегері, Оңтүстік полюске бағытталған тұңғыш қазақстандық автокөліктік экспедициясының ұйымдастырушысы, бүгінде Л. Гумилев атындағы Еуразия ұлттық университетінде қызмет атқарып жүрген профессор Орденбек Мазбаевпен кездесу ұйымдастырылды. Шараға аудан әкімінің орынбасары Қ. Қасымов, аудандық ішкі саясат бөлімінің басшысы Н. Игенбаев, № 13 орта мектебінің директоры Ш. Шәріпбаева, Б. Римова атындағы мектеп-гимназиясының директоры Ғ. Дихамбаев және аудан мектептерінің ұстаздары мен оқушылары қатысты.

«Атың барда желіп жүріп жер таны, асың барда беріп жүріп ел таны» деген жақсы сөз бар қазақта. Бұл мақал, Орденбек Білісбекұлына арналғандай», - деп алғашқы сөзді бастаған Қайрат Саханұлы Үштөбе қаласында туылып, № 262 аралас мектепте оқып-жетілген жерлесіміздің Жер шарының Оңтүстік полюсі мен Азияның кіндігінде, бас-аяғы 30-ға жуық елде болып, 350-ден астам ғылыми еңбек жазғанын мақтанышпен баяндап, сәті түскен кездесу жастардың болашағына азды-көпті септігін тигізеріне сенім білдірді.

Жиын барысында Орденбек Білісбекұлы жалпы еліміздегі туризмнің бүгінгі таңдағы және келешектегі жоспары жайлы айтты. Оқушыларға әсіресе Оңтүстік полюске барған автокөліктік экспедициясы қызықтырды, сан алуан сұрақтар қойылды. Ғалымның ең басымырақ айтқаны - Қазақстан Антарктида келісім-шартына кірмегені, бүгінгі таңда оған бірнеше елдердің тіпті ТМД ішіндегі Эстония, Белоруссия, Украина секілді елдерінің кіріп үлгергені туралы айтылды. Сонымен қатар Шоқанның жүрген жолдары Қашқар саяхаты «Қазақстан аңыздары» деп аталатын сапарында автокөлікпен неше күнде шарлап шығуға болатындығы жайлы қызықты әңгімелеп берді. Артынша көпшілік тарапынан қойылған сауалдарға толықтай жауап берді. Кездесу қатысушылары саяхатшының оқушы кезін, географ болуына не ықпал еткенін және туризмге қалай бет бұрғанын, әлемнің қандай жерлерін аралағанын, соның бәріне уақытты қайдан табатынын, бойындағы күш-жігерінің сыры мен ендігі арманы, алдағы жоспарларынан мол мағлұмат алды.

Өз кезегінде сөз алған Назкен Игенбайұлы мен Ғалымжан Тортбайұлы әрбір жас азамат алдында келешектің басты өмірлік құндылығы – Отанымыздың тағдырына ерекше жауапкершілікпен қарап, оның мүддесін қорғауға әзір болып, халқымыздың мәдениеті мен дәстүрін құрметтеу міндетінің тұрғанын тілге тиек етті. Кездесуден ерекше әсер алған мұғалімдер мен оқушылар қонақтарға алғысын айтып, естелік суретке түсіп, тарқасты.

Альфита ОРАЗБЕКҚЫЗЫ

Жаңа әлеуметтік көмек түсіндірілді

 

  Қазан айының 31 күні аудан әкімдігінің мәжіліс залында 2018 жылдан бастап қолданысқа енгізілетін жаңа форматтағы атаулы әлеуметтік көрсету тәртібінің өзгеруін түсіндіру бағытында келелі жиын өтті. Басқосуға Алматы облысының жұмыспен қамтуды үйлестіру және әлеуметтік бағдарламалар басқармасының бас маманы Назгүл Молбосынова, аудандық жұмыспен қамту орталығының директоры Ақжайық Кілтбаева, аудандық жұмыспен қамту және әлеуметтік бағдарламаларбөлімінің сектор меңгерушісі  Алмагүл Қарымсақова және аудан тұрғындары, мемлекет тарапынан жәрдемақы, әлеуметтік көмек алушылар қатысты. Кездесуді аудан әкімінің орынбасары Қайрат Қасымов ашып, жүргізді.

 

         Келер жылдың басынан бастап елімізде жаңа форматтағы атаулы әлеуметтік көмек енгізілмек. Жаңа заң бойынша үш әлеуметтік төлемнің орнына отбасының табысына сәйкес берілетін жаңа форматтағы атаулы әлеуметтік көмекті тағайындау көзделуде.

- «100 нақты қадам» Ұлт жоспарының 84 қадамы бойынша әлеуметтік көмектін сипаттығын арттыру бойынша 2014 жылдан бастап «Өрлеу» жобасы іске асырылып жатыр. 2018 жылдың 1 қаңтарынан бастап 84 қадамның жалғасы ретінде жаңа форматтағы атаулы әлеуметтік көмек қолданысқа енгізіледі. Яғни, бүгінгі күні алып отырған мемлекеттік әлеуметтік көмек, 18 жасқа дейінгі баланың отбасына берілетін мемлекеттік жәрдемақы, төрт немесе бес баласы бар отбасыларға берілетін жәрдемақының үшеуін біріктіріп, жаңа форматтағы әлеуметтік көмек беріледі, - дейді Алматы облысының жұмыспен қамтуды үйлестіру және әлеуметтік бағдарламалар басқармасының бас маманы Назгүл Қабидоллақызы.

  Жаңа форматтағы атаулы әлеуметтік көмектің қазіргі әлеуметтік төлем түрлерінен өзгешелігі – аз қамтамасыз етілген азаматтарға немесе отбасылаға берілетін атаулы әлеуметтік кешенді болып, 3 түрлі мемлекеттік қолдауға ие болып отыр. Департамент өкілінің айтуынша, жаңа форматтағы әлеуметтік көмек шартты және шартсыз болып екіге бөлінеді. Шартсыз ақшалай көмек құрамында еңбекке қабілетті мүшелері жоқ отбасыларға, сондай-ақ еңбекке қабілетті мүшелері объективті себептерге байланысты жұмыспен қамту шараларына қатыса алмайтын отбасыларға көрсетіледі. Ал шартты ақшалай көмек құрамына еңбекке қабілетті кем дегенде бір мүшесі бар аз қамтылған отбасыларға ұсынылады. Олар жұмыспен қамтудың белсенді шараларына қатысу міндетті.

    Бір айта кетерлігі, атаулы әлеуметтік көмектер бұған дейін беріліп келген мөлшерден кем болмауы үшін кедейшілік шегінің 40 пайызынан 50 пайызға дейін көрсетілмек. Шарты және шартсыз ақшалай көмек отбасының ең төменгі күнкөріс деңгейінің 50 пайызынан төмен болған жағдайда төленеді.

   «Атаулы әлеуметтік көмек көрсетудің жаңа тәсілдері «Өрлеу» жобасы аясында сынақтан өткізіле отырып, өзінің тиімділігін көрсетті. «Өрлеу» жобасын іске асыру кезеңінде құрамында 63 адамы бар 414 отбасы жобаға қатысқа болатын. Соның ішінде жобаның 42 еңбекке қабілетті мүшесі жұмыспен қамтудың белсенді шараларына қатысты. Бұл жобаға қатысушылардың табысының  екі есеге өсуіне мүмкіндік берді» дейді Назгүл Молбосынова.

   Департамент өкілі көкейдегі сауалдарын жолдаған аудан тұрғындарына тұщымды жауаптар қайтарып, жаңа әлеуметтік көмек жұртты алдына қойған мақсатына жетуіне септігін тигізетінін атап өтті.

 

 А. Өмірбаев.

       

 

Алматы облысының ҮЕҰ өкілдеріоқыту тренингіне қатысты

Бүгінгі күні республика аумағында Үкіметтік емес ұйымдарды мемлекеттік қолдау механизмін жетілдіру жобасы іске асырылуда. Қоғамдық ұйымдардың азаматтық қоғам мен мемлекеттік мекемелермен қалай жұмыс істейтінін талдау үшін тренингтер ұйымдастырылды. Осы тренинтардың бірі Талдықорған қаласында  «Халықты шешім қабылдау үдерісіне тарту құралдарын дамыту» тақырыбында өтті. Бұл туралы Алматы облысының өңірлік коммуникациялар қызметі алаңында «Eurasian expert Council» қоғамдық қорының президенті Лепсібаев Шыңғыс мәлімдеді.

Алматы облысында ҮЕҰ-ды дамыту бойынша белсенді жұмыстар жүргізілуде. Облыста 742 үкіметтік емес ұйым бар. Тренинг 2 бөлікке бөлінді. Бірінші жиынға  белсенді жастар, екіншісіне ҮЕҰ өкілдері қатысты. Ұйымдастырушыныңайтуынша, осындай тренингтардағы ақпараттар тәжірибеге де сүйеніп берілетіні айтылды.

«Қазір біз Талдықорғанда түрлі жаттығулар өткіземіз. Олар ҮЕҰ-ды оқытуға ғана емес, кері байланыс алу үшін де қажет.Яғни, мемлекеттің өңірлерге қалай көмектесе алатындығын анықтау және қоғамдық ұйымдармен өзара іскерлікжұмыстарды жақсарту», - деді тренинг ұйымдастырушысы Лепсібаев Шыңғыс.

Сондай-ақ ҮЕҰ-ның жұмысы аймақтарда мұқият жүргізілетіні  жайлыда айтты.

Айта кетейік, республикада 29 мыңнан астам ҮЕҰ тіркелген, олар заң бойынша халықаралық тәжірибе алуға мүмкіндігі жоқ. Сондықтан осы тренингтерді  өңірлерде өткізу өте маңызды.

Алматы облысы латын қарпіне көшуді қолдауда

 

          Талдықорған қаласында «Латын қарпіне көшу - бұл қазіргі заманғы таңдау» тақырыбында кездесу өтті. Оған мәслихат депутаттары, Үкіметтік емес ұйымдар, саяси партиялар және БАҚ өкілдері қатысты. Жиынның мақсаты  ҚР Президенті Н.Назарбаевтың «Болашаққа бағдар: рухани жаңғыру» бағдарламасын жүзеге асыру аясында тұрғындар арасында латын қарпіне көшу қажеттілігі бойынша түсіндіру жұмыстарын жүргізу және латын қарпіне көшу бойынша өзекті мәселелерді талқылау.

        

«Ұлтымыздың басынан үш алфавит жүйесін өткергендігін білеміз. Латын әліпбиіне көшу туралы ой-пікірлер 1926-1929 жылдардан бастау алғаны баршамызға белгілі. Жалпы Елбасымыздың латын әліпбиіне көшу саясатын қолдаймын. Себебі, латын әліпбиіне көшудегі негізгі ұтымдылық - тіл ауыспай, таңбаның ауысуы. Сонымен қатар  қарапайым тілмен айтсақ, сөзді немесе дыбысты қалай естісек, жазылуын да солай жазамыз. Қазіргі таңда ғаламның 70 % латын әліпбиіне көшкен. Латын қарпіне көшсек бізді бүкіл әлем оқитын болады», -  Талдықорған қаласының Қоғамдық Кеңесінің мүшесі  Қаламқас Есенқұлқызы.

Жиын соңы пікір-талас,  сұрақ-жауап форматымен аяқталды және латын тілі бірнеше параметрлер бойынша оңтайлы болып табылатыны сөз етілді.

 

Біздің журнал

FacebookTwitterMixxVimeo

Күнтізбе

« Желтоқсан 2017 »
Дс Сс Ср Бс Жм Сб Жк
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31