Оқушылар жаңа автобуспен тасымалданады

  • Бәрекелді!

 

    Қазіргі таңда балалардың сапалы білім алу үшін мемлекет тарапынан барлық жағдай жасалуда. Елбасы Н. Назарбаев келер жылды «Жастар жылы» деп атауы да тегін емес. Жас ұрпақ – біздің ертеңгі болашағымыз. Сондықтан олардың дұрыс тәрбие мен білім алулары үшін аудан көлемінде де игі істер атқарылып жатыр. Жуырда «Қауіпсіз мектеп автобусы» республикалық акциясы аясында балаларды білім беру ұйымдарына тасымалдауды ұйымдастыру мен олардың қауіпсіздігін қамтамасыз ету мақсатында нақты шаралар қолға алынды.  Нақтырақ айтар болсақ, аудандық білім бөлімі тарапынан Жамбыл атындағы орта мектебіне Бесағаш, Бірлікбаз, Бірлік шалғайдағы елді мекендерден оқушыларды тасымалдайтын 25 орындық ПАЗ-32053 маркалы автобус сатып алып берілді. Жаңа автобусқа оқушылар мен ата-аналар қуанып жатыр. Жамбыл орта мектебінің директоры Назира Артықбаеваның айтуынша, Бесағаш ауылынан – 26, Бірлікбаздан – 9, Бірлік ауылынан 36 оқушы, жалпы саны 71 оқушы тасымалданады. Осы елді мекендерге осыған дейін оқушылар ескілеу 12 орындық «Газель» көлігімен мектепке жеткізілетін. Міне, енді ауыл жұртшылығы кең әрі жайлы жаңа автобусқа қол жеткізіп отыр.

А. Бақытұлы.  

Әлемді жүрегіммен сеземін

  • 13 қараша – халықаралық зағиптар күні

 

    Қараша айының 13 күні Үштөбе қаласындағы «Қаратал күндізгі болу орталығы» мекемесінде халықаралық зағиптар күніне орай «Әлемді жүрегіммен сеземін» атты тағылымы терең іс-шара өтті. Кешке аудан әкімінің орынбасары Қайрат Қасымов, облыстық соқырлар қоғамы басқармасының төрағасы Аликен Даркебаев, басқарма мүшесі Сарболдақ Мустапанова, республикалық мүгедектер қоғамы қауымдастығының төрағасы Элла Ким және мүмкіндігі шектеулі жандар мен олардың ата-аналары қатысты. 

     

  Осынау қым-қуыт тіршілікте қолда барды бағалай алмай, күллі ғаламды жаратқан Алланың берген нығметтерінің кереметтігін сезіне бермейміз. Иә, күн сайын жарқыраған күннің алаулаған шапағын, көгілдір аспандағы мамық бұлттарды, жазда жайқалған ағаштар мен көздің жауын алатын гүлдер мен көбелектерді көрудің өзі зор бақыт екенін түсінбейміз. Қыстағы аппақ ұлпа қардың ұшқынын, желдің лебін сезгенмен, бір көруді армандап жүргендер қаншама. Десек те, жер бетіндегі сұлу табиғатты көрмесе де, түйсігімен сезініп, алақанымен аялап, өмірге құштарлығын жоғалтпаған жандар арамызда жүр.

   Аудан әкімінің орынбасары Қ. Қасымов зағип жандарды төл мерекесімен құттықтап, мемлекет тарапынан мүмкіндігі шектеулі жандарға барынша көмек көрсетілетінін айтты. Жергілікті атқарушы билік тарапынан жарымжан жандардың мәселелеріне баса назар аударылып, зағип жандардың қоғамда өзіндік орын алатын тұлға ретінде сезінуге барлық жағдай жасалып жатқанын тілге тиек етті.  Іс-шара барысында қазіргі таңда зағип жандардың көру мүмкіндігі болмаса да, Брайль шрифтімен арнайы жазуға, оқуға көмектесетін құралдар бар екені айтылды. Олар жарық дүниені көре алмаса да, олар қоғамдық өмірге араласып, ән салып, музыкалық аспапта ойнап, өлең оқиды.

   Кеш барысында мүмкіндігі шектеулі жандар өнерде шектеу болмайтынын ұғындырды. «Біз бақытты баламыз» атты халықаралық фестивальдің жүлдегері Диана Дәулет «Аққудай арман» әнімен баурады. Бір айта кетерлігі, көз жанарынан айырылған Рэй Чарльз, Стиви Уандар, Андреа Бочелли секілді әлемге әйгілі тұлғалардың шығармалары тыңдалды. Сондай-ақ, бүгінде жаһанға белгілі отандық фортепианист, музыка академигі Саида Қалықова, «Сәт триосы» тобының әндері экран арқылы көрсетілді.

   Шара барысында басқа түскен қиындыққа мойымай, өмірге деген іңкәрлік пен құштарлық арқылы өнерді серік еткен Айгерім Көпбаева, Алғысбек Дәурен, Нұрдана Арғын, Айгүл Иманберлинова, Сабина Орналы секілді азаматтар көпшілікке рух беріп, сабырға шақырып, ой салды. Адамдық пен адалдықты ту еткен жандар сырымен бөлісіп, өмірдің әрбір күні үшін қуану қажет екенін айтты.  Әнді жан-жүрегіммен сезіне білген Айгерім Көпбаева көпшілікті елжіретсе, Дәурен Алғысбек сезімтал саусақтармен музыкалық аппаратурада айна-қатесіз күй шалқытты.

  «Көздің соқырлығынан емес, көңілдің соқырлығынан сақта» деп халқымыздан қалған тәмсілді тұмар тұтқан «Қаратал күндізгі болу орталығының» директоры Ирина Байгазакова алтын уақыттарын бөліп келген азаматтарға «Көңілдеріңіз ашық, көкіректеріңіз ояу болсын!» деген ізгі ниетпен ризашылығын білдіріп, сый-сыяпат көрсетті.

А. Өмірбаев.

Қарақұм ауылында ауыз су жүйесі іске қосылды

*Бәрекелді!

 

 

2017-2018 жылдары Өнірлерді дамыту бағдарламасының шеңберінде ауданымызда ауқымды шаралар жүргізілді. Нақтырақ айтсақ, 2017 жылы басталған Қарақұм ауылының сумен жабдықтау жүйелерінің құрылысын «Айко» ЖШС-гі жалпы 132,939 млн. теңгеге жүргізді. Нысан бойынша 1 және 2-ші көтермелі насос станциялары, су мұнарасы, 2 дана резервуарлар, 2,9 км. су құбырлары, 36 дана құдықтар орнатылды. Қазіргі таңда  Қарақұм ауылының көптен күттірген қуантарлық жаңалығы - ауыз су жүйесі іске қосылды. Қарақұм ауылының тұрғындары таза ауыз суға қолдары жеткеніне қатты қуанып жатыр. Халық көп жылдар бойы ауыз судан тарығып, көлікпен тасып әкелетін суды зарыға күтіп отыратын. Енді міне, көптен күткен су әр үйде шөлпілдеп ағып тұр.   

 

 

Жас өренге үміт артты

* Құрмет

 

   Қазан айының 25 күні аудан әкімі Рауан Рақымбеков болашағынан зор үміт күттіретін спортшылардың бірі – зілтемір көтеруден республикалық жарыстарда атой салып жүрген жерлесіміз Сайхан Тайсуевты қабылдап, сый-сияпат көрсетті.

  Сайхан Тайсуев биыл 10-16 қазан аралығында Орал қаласында жасөспірімдер арасында ауыр атлетикадан өткен жарысқа қатысып, 67 келі салмақ бойынша сынға түсіп, 1 орынды жеңіп алды. Жұлқа көтеруде - 122, серпе көтеруде - 163 келіні, жалпы 285 келіні еңсерді. Осылайша, ҚР спорт шебері нормативін орындап, 17 жасқа дейінгілер арасында рекорд жаңартты.   Ол жуырда Аргентинаның Буэнес-Айрес қаласында өткен жасөспірімдер олимпиадасына дайындалып жүрген, алайда жасөспірімдер олипиадасына қатысуға ниет білдірген Қазақстан, Ресей, Қытай, Беларус, Украина секілді мемлекеттердің өтініші қабылданбай, жерлесіміз бұл жолы дүбірлі додаға бара алмады. Егер осынау жарысқа қатысқанда жүлдеге қол созары анық еді. Десек те, Сайхан Тайсуевтың жасы небәрі 16 жаста екенін ескерсек, әлі талай шыңды бағындырады деп сенеміз. Сайхан Маирбекұлы наурыз айында Лас-Вегас қаласында жасөспірімдер арасында өтетін әлем чемпионатына дайындалып жүр. Оны жеке бапкері Дмитрий Ольховский жаттықтырады. 

  Емен-жарқын әңгіме барысында аудан әкімі Рауан Тұрданғазыұлы ауданымыздың атын шығарар жас спортшыдан үлкен үміт күтетінін айтып, ақ жол тіледі. Сайхан Тайсуевты ынталандыру мақсатында иығына шапан жауып, бағалы сыйлық беріп, құрмет көрсетті.

А. Бақытұлы

 

 

Асыл аналар ардақталды

* Аудан әкімдігінде

 

    Дүйсенбі күні аудан әкімдігінің мәжіліс залында өткен лездемеде аудан әкімі бірқатар «Алтын алқа», «Күміс алқа» иегерлерін салтанатты жағдайда марапаттады. 

    Қазақстан  Республикасы   Президентінің   2018 жылғы 7 тамыздағы № 728 Жарлығымен ауданымыздың көп балалы аналары «Алтын алқа» және «Күміс алқа» мемлекеттік медалінің иегері атанған еді. Олардың қатарында алтын құрсақты аналар - Үштөбе қаласының тұрғыны Рысқан Мустафаева, Елтай ауылдық округінің тұрғыны Жазира Нурбопаева, сонымен бірге көп бала тәрбиелеп күміс алқаға қол жеткізген Үштөбе қаласының тұрғындары Лаура Джилбаева, Наталья Остинцева, Ескелді ауылдық округінің тұрғыны Бисолтан Майрақан да бар.

- Құрметті аналар! Сіздерге зор денсаулық, ұзақ өмір, бақыт тілеймін! – деген аудан әкімі Рауан Рақымбеков аналарға алқа тағып, гүл шоқтарын ұсынды.

   Сөз алған ақ жаулықты ана Рысқан Мустафаева құрмет көрсеткен аудан басшысына алғысын білдіріп, елімізге – тыныштық, өскелең ұрпаққа бақытты өмір тіледі.

Өз тілшіміз      

 

Біздің журнал

FacebookTwitterMixxVimeo

Күнтізбе

« Желтоқсан 2018 »
Дс Сс Ср Бс Жм Сб Жк
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31